Fact-check: ሳፋሪኮም የቴሌግራም ቻናሉን ለሚቀላቀሉ 12ሺ ሰዎች ሽልማት አዘጋጅቷል?

ሐሰት፡ ሳፋሪኮም “የቴሌግራም ቻናሉን ለሚቀላቀሉ ሽልማት አዘጋጅቷል” በሚል የተሰራጨው መረጃ ሐሰተኛ ነው

በኢትዮጵያ የቴሌኮም ዘርፍ ለመሰማራት የተደረገውን ጨረታ ከሌሎች አለም አቀፍ ተቋማት ጋር በጥምረት አሸናፊ በሆነው በኬንያው ሳፋሪኮም ኩባንያ ስምና አርማ የተከፈተ “Safaricom Ethiopia” የተባለ የቴሌግራም ቻናል “ሳፋሪኮም ቻናሉን እስከ ጥቅምት 15 ለሚቀላቀሉ 12ሺ ሰዎች በተለያየ መጠን የድምጽ እና ኢንተርኔት ጥቅል እንዲሁም የገንዘብ ሽልማት አዘጋጅቷል” የሚል መረጃ አሰራጭቷል።

አዲስ ሚዲያ በሃቅ ማንጠሪያ ክፍሉ በኩል ከኮድ ፎር አፍሪካ ጋር በመተባበር በቴሌግራም ቻናሉ በተሰራጨው መረጃ ላይ ዳሰሳ አድርጓል።

የቴሌግራም ቻናሉ ነሐሴ 2 ፣ 2012 (August 8, 2020) የተከፈተ ሲሆን ሳፋሪኮምን የተመለከቱ መረጃዎች ማሰራጨት የጀመረው ከመስከረም 25 ፣ 2014 (October 25, 2021) ነው።

በተደረገው የማጣራት ስራም ከዚህ በታች የሚገለጹትን ግኝቶች ዋቢ በማድረግ ቻናሉ ሐሰተኛ መሆኑ ተረጋግጧል።

1. በኬንያው ሳፋሪኮም ኩባንያ የሚመራው ጥምረት በኢትዮጵያ የቴሌኮም ዘርፍ የወጣውን ጨረታ በ850 ሚሊየን ዶላር አሸናፊ መሆኑ የተረጋገጠው ግንቦት 14 ፣ 2014 (May 22, 2021) ነው።

2. በቲውተር እውነተኛነቱ በተረጋገጠው የሳፋሪኮም ኢትዮጵያ ይፋዊ ገጽ ኩባንያው በስሙ ሀሰተኛ የማህበራዊ ሚዲያ ትስስር ገጾች መከፈታቸውን የሚገልጽ የጥንቃቄ መልእክት አስተላልፏል።

   ሳፋሪኮም በዚህ መልእክቱ ከፌስቡክ ፣ ሊንክዲን ፣ ኢንስታግራም እና ቲውተር ውጪ ሌላ የማህበራዊ ሚዲያ ትስስር ገጽ እንደሌለው ገልጿል።

   በመሆኑም “Safaricom Ethiopia” በሚል የተከፈተው የቴሌግራም ቻናል የሳፋሪኮም አለመሆኑን የቀረበው የሽልማት አይነት ሐሰት መሆኑን አረጋግጠናል።

   ይህ የእውነታ ማጣራት በአዲስ ሚዲያና ኮድ ፎር አፍሪካ ትብብር የቀረበ ነው።

Subscribe to AddisMedia Channel